上戲劇課的時候，有一個我還未做的練習，叫「一個宏大的理想」。我真的有過很偉大的理想，就係覺得呢個世界應該無性別之分，無論係生理心理定係社會性別。這也是我的FYP念頭萌生時（三年前）想表達的思想，貌似個平權大愛左膠。但愈來愈多的經歷令我發現當中的不可行性，因為如果無性別就唔會有同性戀或異性戀的偏好（而可能我的烏托邦是人人都係泛性戀），正如人的體態燕瘦橫肥，有人鍾愛胖子覺得好有安全感，而我就偏愛身高不過175cm的人（如果唔係會顯得我矮）。生理男同女或雙性都只係一個外顯嘅特徵，亦因此會令人產生偏好的選擇，就好似一個男同性戀想要活生生的陽具，但你無奈是生理女，就算強行拎碌假嘅俾佢都毫無意義。另一樣就係變性人，佢哋就係因為生錯性徵先會想做手術，咁如果無性別（烏托邦是人人雙性），就唔會有偏好（總有人只會想要其中一樣），變相扼殺咗佢哋選擇的自由。而心理性別同樣也是喜好問題，即使你認同性向是個光譜，但都需要將男女二分作為指標（如果唔係又個個都泛性戀啦）。所以生理及心理性別是否必不能被推翻？我此刻會想，或許就好似《小寫之可能》咁唯有盡量接近，而最接近的點可能就係當你發現自己有咗而未知佢係男定女定雙性，但僅僅視佢為一個新生命的存在時。

社會性別就比較容易，因為可以透過改變自己的想法，避免將形容詞歸類為陽剛或陰柔氣質，或將某些行為定型為某個性別才會做的/是其責任。而我在戲劇課打算講的是「在大專院校舉辦一個任何人都可以穿裙子的活動」，所以這個計劃就係想將性/別界限模糊化，特別挑選一些被刻板印象荼毒最深的商品來玩。（如果真係有人肯陪我做呢個campaign就好了XD）因為我以前很迷歌德式的衣著打扮，他們主張雌雄同體，生理男也會穿裙子——其實早在古希臘時期，男性穿裙已是常態。又例如男穿藍女穿粉，都只不過是出於二戰後商家的詭計，而在此之前是逆轉，又或更準確來說，顏色根本就不分性別，只是人最愛分類，好讓自己獲得操控人事物的權力。

講了一大堆，也不忘感激 @soulc.am 願意跟我拍攝有關性別的題材，以及形象百變的拍檔 @2.9fa 。對於性/別的探討我實在寫得太多，FYP也好其他作品也是，開始寫到連我都覺得厭。但原來世上仍舊有很多人恍似處於另一世界另一維度，甚至閂埋雙耳拒絕理解與溝通。不過我就真係尊重不同價值觀，只係道不同不相為謀而已。